NATO paralajmëroi Rusinë se do të përdorë të gjitha mjetet e nevojshme ushtarake dhe jo-ushtarake – për të mbrojtur aleatët dhe për të penguar kërcënimet pas disa incidenteve ku Rusia shkeli hapësirën ajrore të anëtarëve të NATO-s, javën e kaluar.
Anëtarët e NATO-s u takuan për konsultime në Bruksel pasi tre avionë luftarakë rusë hynë në hapësirën ajrore të Estonisë, javën e kaluar dhe një numër i madh dronësh rusë depërtuan në hapësirën ajrore të Polonisë në fillim të muajit.
Rumania gjithashtu raportoi hyrjen e një droni rus në hapësirën e saj ajrore, këtë muaj.
“Rusia nuk duhet të ketë asnjë dyshim, se NATO dhe aleatët do të përdorin – në përputhje me ligjin ndërkombëtar – të gjitha mjetet e nevojshme ushtarake dhe jo-ushtarake për të mbrojtur veten dhe për të penguar të gjitha kërcënimet nga të gjitha drejtimet”, thuhet në një deklaratë të përbashkët të lëshuar pas takimit.
“Ne do të vazhdojmë të përgjigjemi në mënyrën, kohën dhe fushën që zgjedhim ne. Angazhimi ynë ndaj Nenit 5 është i palëkundur”, tha NATO.
Leave a Reply