Aktivistët në bordin e një flotilje ndërkombëtare ndihmash e destinuar për në Gaza kanë akuzuar Izraelin për kryerjen e sulmeve të përsëritura ndaj anijeve të tyre gjatë natës. Grupi CODEPINK me qendër në SHBA, raportoi të paktën 11 incidente. Një aktivist raportoi rreth 15 ose 16 dronë gjatë natës.
Flotilja, e njohur si “Global Sumud Flotilla” (GSF), postoi video që tregonin disa shpërthime gjatë natës, të cilat tha se ishin granata tymuese – të projektuara për të çorientuar objektivat me shpërthime të forta dhe shkëndija të ndritshme.
Afërsisht, 50 anije aktualisht ndodhen pranë ishullit grek të Kretës dhe synojnë të thyejnë bllokadën detare të Izraelit ndaj Rripit të Gazës – për të ofruar furnizime humanitare.
Ministria e Jashtme e Izraelit tha se do të merrte masat e nevojshme për të parandaluar hyrjen e flotiljes në zonën e luftimeve – dhe për të ndaluar çdo shkelje të bllokadës së ligjshme detare, duke bërë çdo përpjekje të mundshme për të garantuar sigurinë e pasagjerëve të saj.
Ministria, e cila i quajti anijet “flotilje të Hamasit”, tha se kishte propozuar që ndihmat të shkarkoheshin në Ashkelon, një qytet izraelit që ndodhet disa kilometra në veri të Rripit të Gazës.
Një zëdhënëse e flotiljes tha se të paktën dy anije ishin dëmtuar, por nuk kishte patur viktima – duke i quajtur masat e Izraelit “plotësisht të paligjshme” në ujërat ndërkombëtare.
Leave a Reply