SHBA: Zgjedhja e kreut të ri të SPAK të zhvillohet me integritet

E Ngarkuara me Punë e Shteteve të Bashkuara të Amerikës në vendin tonë, Nancy VanHorn zhvilloi dje një takim me kryetaren e Këshillit të Lartë të Prokurorisë, Mirela Bogdanin.

Ambasada e SHBA-së në Tiranë bëri të ditur se në takim u diskutua mbi ngjarjet e rëndësishme që do të zhvillohen në KLP.

“Integriteti i procesit për zgjedhjen e Prokurorit të Posaçëm të SPAK është thelbësor për vazhdimin e bashkëpunimit mes Shteteve të Bashkuara dhe Shqipërisë në luftën kundër krimit të organizuar ndërkombëtar dhe për forcimin e sigurisë së vendeve tona”, thuhet në njoftimin për shtyp të ambasadës së SHBA-së në Tiranë.

Kreu i SPAK, Altin Dumani është në përfundim të mandatit të tij 3-vjeçar, ndërsa Këshilli i Lartë i Prokurorisë vendosi shpalljen e vendit vakant për drejtues të Prokurorisë së Posaçme Kundër Korrupsionit dhe Krimit të Organizuar në 17 shtator.

Prokurorët do të kenë mundësi të aplikojnë për këtë post me rëndësi deri më 8 tetor të këtij viti.