Sanksionet e OKB-së duket se do të rikthehen ndaj Iranit, pavarësisht një përpjekjeje të fundit të Kinës dhe Rusisë për të shtyrë vendimin dhe për të lejuar bisedime të mëtejshme, thonë diplomatët.
Fuqitë evropiane po ushtrojnë presion ndaj Iranit për të tërhequr një seri masash që vendosi pas bombardimeve të Izraelit dhe SHBA-së ndaj objekteve të tij bërthamore në qershor.
Duke u ankuar se Irani nuk ka përmbushur një marrëveshje të rëndësishme, por të pezulluar, evropianët kanë nxitur rikthimin e sanksioneve të gjera të OKB-së, veçanërisht ndaj sektorëve të bankave dhe naftës, të cilat pritet të hyjnë në fuqi në fund të së shtunës.
Në një seancë sot të Këshillit të Sigurimit, Kina dhe Rusia propozuan një draft rezolute që do t’i jepte gjashtë muaj të tjerë kohë për bisedime, deri më 18 prill 2026 .
Por diplomatët thanë se nuk pritet që ky draft të marrë nëntë vota nga 15 anëtarët e Këshillit të Sigurimit për t’u kaluar.
Presidenti francez Emmanuel Macron u takua të mërkurën me presidentin iranian Masoud Pezeshkian dhe tha se një marrëveshje ishte e mundur për të shmangur sanksionet, por Irani kishte vetëm disa orë kohë.
Një diplomat, i cili kerkoi te mos identifikohej, tha mbrëmë vonë se evropianët besonin se kishin “bërë gjithçka për të përparuar gjërat”, por Irani nuk ofroi fleksibilitetin e dëshiruar.
Franca, Gjermania dhe Britania e Madhe i kanë kërkuar Iranit se duhet të lejonte akses të plotë për inspektorët bërthamorë të OKB-së, të rifillojë menjëherë negociatat bërthamore dhe të sigurojë transparencë mbi uraniumin e pasuruar, vendndodhja e të cilit ka qenë subjekt spekulimesh.
Leave a Reply