Forcat Rezervë Operacionale të Turqisë, mision të përkohshëm në Kosovë

Forcat Rezervë Operacionale të Turqisë (ORF) kanë mbërritur në Kosovë për një vendosje të përkohshme në kuadër të misionit paqeruajtës të NATO-s, KFOR.

Sipas njoftimit të KFOR-it, ushtarët turq u pritën në bazat e këtij misioni në Kosovë dhe do të kontribuojnë në ruajtjen e sigurisë dhe stabilitetit në vend.

Në muajt e ardhshëm, Batalioni turk i ORF-it do të zhvillojë një sërë aktivitetesh në bashkëpunim me njësi të tjera të KFOR-it, duke qenë i gatshëm të përgjigjet ndaj çdo zhvillimi të situatës së sigurisë në Kosovë.

NATO vlerëson se përforcime të tilla rrisin fleksibilitetin operacional të KFOR-it dhe aftësinë për t’iu përgjigjur në kohë sfidave të reja të sigurisë.

Më 3 tetor, komandanti në largim i KFOR-it, Enrico Barduani, me një ceremoni e cila do të mbahet në Prishtinë do t’ia dorëzojë detyrën komandantit turk Özkan Ulutaş.