Kryetari i shkarkuar i Bashkisë së Tiranës, Erion Veliaj, ka kundërshtuar në Gjykatën Kushtetuese largimin e tij nga detyra me vendim të Këshillit të Ministrave, pas propozimit të Këshillit Bashkiak të kryeqytetit.
Në ankimin e Veliajt theksohet se neni 62 i ligjit për qeverisjen vendore, që i referohet mungesës në detyrë të të zgjedhurit, nuk mund të zëvendësojë nenin 115 të Kushtetutës, por duhet interpretuar gjithmonë në përputhje me të.
Sipas kërkesës së Veliajt, çdo shkarkim pa një shkelje të rëndë të provuar është i paligjshëm dhe bie ndesh me parimet kushtetuese.
Në bazë të Kushtetutës, ankesa në Gjykatën Kushtetuese pritet ta pezullojë zbatimin e vendimit të Këshillit të Ministrave dhe procedurat pasuese për organizimin e zgjedhjeve në Tiranë.
Leave a Reply