Kryeministrja daneze Mette Frederiksen u bëri thirrje Evropës dhe NATO-s që të veprojnë me shumë më tepër urgjencë për forcimin e rezistencës ushtarake dhe shoqërore kundër “agresionit rus dhe kërcënimeve hibride”.
Duke folur në takimin e shtatë të Komunitetit Politik Evropian, Frederiksen paralajmëroi se pavarësisht diskutimeve të gjera për paqen në Ukrainë, sulmet e Moskës nuk janë ngadalësuar. “Gjatë muajve të fundit është folur shumë për paqen në Ukrainë, me takime e brifingje, ndërkohë që Rusia vazhdon sulmet e saj brutale,” tha ajo.
“Tani duhet të jetë e qartë për të gjithë: Rusia nuk do të ndalet derisa të detyrohet,” shtoi Frederiksen.
Ajo pranoi se shumica e vendeve kanë shtuar përpjekjet mbrojtëse, por theksoi se përparimi mbetet tepër i ngadalshëm.
“Jemi në rrugë, por duhet të lëvizim shumë më shpejt. Duhet të mësojmë nga Ukraina,” tha ajo.
Frederiksen theksoi se strategjia e Kremlinit shkon përtej fushëbetejës, duke përmendur përdorimin e taktikave hibride.
“Një ditë janë dronë ushtarakë. Ditën tjetër janë migrantë që shtyhen përtej kufijve… Shënjestrojnë infrastrukturën kritike… dezinformata… përpjekje për ndërhyrje në zgjedhjet demokratike,” tha ajo.
“Siguria, natyrisht, nuk është vetëm çështje e mjeteve ushtarake. Është çështje e zemrave dhe mendjeve tona,” shtoi kryeministrja.
Ajo e lidhi sigurinë me qëndrueshmërinë e gjerë ekonomike, duke bërë thirrje që Evropa të sigurohet për të ardhmen përmes vendeve të punës, shëndetësisë dhe teknologjisë.
“Duhet të krijojmë vende pune për të ardhmen. Duhet të zvogëlojmë varësinë tonë. Duhet të investojmë në teknologji të reja dhe të sigurojmë lëndët e para kritike që janë të domosdoshme,” tha Frederiksen.
Leave a Reply