Turqi, marshime dhe aktivitete solidariteti në mbështetje të Gazës

Në disa qytete të Turqisë u zhvilluan të shtunën marshime dhe aktivitete solidariteti në mbështetje të popullit palestinez dhe të flotiljeve që udhëtojnë drejt Gazës për të çarë bllokadën izraelite dhe për të dërguar ndihma humanitare, të cilat po sulmohen nga Izraeli.

Në Stamboll, fondacioni IHH dhe Platforma për Mbështetjen e Palestinës organizuan një marshim me moton “Ecim drejt lirisë”, për të shprehur përkrahjen ndaj 11 anijeve me 146 aktivistë nga 22 vende, që janë pjesë e Flotiljes së Lirisë. Marshuesit u nisën nga Xhamia Ayasofya drejt rrethit Eminonu duke mbajtur pankarta me mbishkrime si “Vrasës Izrael, largohu nga Palestina” dhe “Nga lumi në det, Palestinë e lirë”.

Protestuesit gjithashtu bartnin pankarta me mesazhe të fuqishme si “Po marshoj për fëmijët e Gazës, ti çfarë po bën?”, “Ku ka shtypje, nuk mund të ketë indiferencë” dhe kërkuan fundin e gjenocidit në Gaza. Në fund të marshimit u mbajtën edhe fjalime publike.

Në Ankara, mijëra qytetarë, përfaqësues të shoqërisë civile, të rinj e të moshuar morën pjesë në “Marshimin e Vendosmërisë për Gazën”, për të dënuar gjenocidin që Izraeli po kryen që prej 8 tetorit 2023 dhe për të ngritur zërin kundër krimeve në Palestinë.