Katari tha sot se të gjitha palët e përfshira në përpjekjet për t’i dhënë fund luftës në Gaza kanë rënë dakord me planin e propozuar të presidentit të SHBA-së Donald Trump, por mbeten ende disa sfida të rëndësishme për zbatimin e tij.
“Shumë aspekte të planit të presidentit Trump duhet të sqarohen”, tha zëdhënësi i Ministrisë së Jashtme Majed al-Ansari në një konferencë për shtyp në Doha.
“Vështirësitë aktuale qëndrojnë në përkthimin e marrëveshjes në hapa konkretë në terren”, tha ai.
Al-Ansari tha se negociatat mbi planin rifilluan sot në Sharm el-Sheikh, Egjipt, ndërsa të gjitha palët po bëjnë përpjekje për progres.
Ai vuri në dukje se bisedimet e djeshme zgjatën rreth katër orë dhe ishin të detajuara dhe intensive, dhe synuan identifikimin e “pengesave” të zbatimit të marrëveshjes.
Ai theksoi se Katari ishte i përkushtuar për të çuar përpara planin e presidentit të SHBA-së, për t’i dhënë fund luftës në Gaza, pushtimit izraelit dhe për të siguruar shpërndarjen e ndihmës humanitare.
“Doha gjithashtu vlerëson “angazhimin” e Uashingtonit për t’i dhënë fund luftës”, shtoi ai.
Zëdhënësi tha se Katari dhe Shtetet e Bashkuara të Amerikës po punonin së bashku për të siguruar – që zbatimi i planit të Trump të mos ishte i përkohshëm – duke theksuar nevojën për një “kornizë praktike dhe të zbatueshme me shpejtësi” të miratuar nga të gjitha palët.
“Dorëzimi i pengjeve do të shënojë fundin formal të luftës, pasi plani i SHBA-së për armëpushim lidhet drejtpërdrejt me lirimin e pengjeve”, tha ai.
“Gjëja e rëndësishme tani është të fillohet me zbatimin e armëpushimit dhe të ndalet makineria e luftës që po “shtyp” trupat e fëmijëve të Gazës”, tha ai.
Leave a Reply