Kryeministri në detyrë, Albin Kurti, ka thënë se pushteti në Serbi po tenton të ndërhyjë në procesin zgjedhor në Kosovë. Ai ka kërkuar reagim dhe sanksionim nga institucionet e Bashkimit Evropian.
“Premtimet për vende pune, kushtëzimi dhe shantazhi me beneficione sociale, deklarimet e zyrtarëve të lartë të Serbisë se vetëm Lista Serbe e mbron Serbinë në Kosovë, siç bëri së fundmi ish-kryeministri i Serbisë, tash këshilltari i presidentit atje, Millosh Vuçeviq janë metoda të përsëritura të ndërhyrjes së Serbisë në procesin zgjedhor në Kosovë”, ka thënë Kurti sot në mbledhjen e qeverisë në detyrë.
Ai e ka quajtur këtë ndërhyrje në procesin komunal zgjedhor si cenim të demokracisë dhe sovranitetit.
“Serbia nuk ka pasur asnjë pasojë nga BE andaj nuk po ndryshon. Kjo ndërhyrje është edhe më e rëndë sesa ajo e Rusisë në Evropë. I bëjmë thirrje BE-së që ta dënojnë ndërhyrjen e Beogradit dhe ta sanksionojë Serbinë, shtet ky kandidat për anëtarësim në BE për veprimet të cilat bien ndesh me parimin e fqinjësisë së mirë dhe shkelin marrëveshjen e Brukselit”, ka deklaruar Kurti.
Leave a Reply