Sanksionet amerikane ndaj kompanisë serbe të naftës “NIS”, e cila është në pronësi kryesore të Rusisë, hynë sot (e enjte) në fuqi. Kompanía, me seli në qytetin verior serb Novi Sad, njoftoi në faqen e saj zyrtare se nuk i ishte dhënë asnjë shtyrje e mëtejshme e masave të vendosura nga administrata e ish-presidentit Joe Biden.
Sanksionet mund të kenë pasoja serioze për Serbinë, e cila varet nga tubacioni kroat JANAF për të gjitha importet e saj të naftës bruto. Ky tubacion transporton naftën nga bregdeti i Adriatikut drejt Evropës Qendrore. Nën sanksionet amerikane, kompania që operon tubacionin nuk mund të negociojë më me NIS.
Autoriteti përgjegjës i Departamentit të Thesarit të SHBA aktivizoi masat ndaj kompanisë pjesërisht shtetërore si rezultat i sanksioneve ndaj gjigandit rus të energjisë, Gazprom, të dizajnuara për t’i privuar Rusinë nga financimi i rëndësishëm për luftën e saj në Ukrainë.
“NIS” tha se ka monitoruar situatën shumë nga afër që nga vendosja e sanksioneve amerikane në janar të këtij viti. Administrata e Presidentit Donald Trump shtyu disa herë hyrjen në fuqi të tyre.
“Aktualisht, kompania ka rezervat e mjaftueshme të naftës bruto për përpunim dhe ruan furnizim të rregullt të të gjitha llojeve të produkteve të naftës për stacionet e saj të karburantit”, thuhet në një deklaratë të NIS.
“Gazprom Neft” dhe një filial i “Gazprom”, “JSC Intelligence”, së bashku zotërojnë 56% të aksioneve në “NIS”. Shteti serb zotëron 30%, dhe 14% i përkasin aksionerëve të vegjël.
Leave a Reply