Këshilli Ndërfetar i Shqipërisë, në përfaqësim të pesë komuniteteve fetare në vend, i ka drejtuar një shkresë zyrtare Presidentit të Republikës, Kuvendit, Kryeministrit, Ministrisë së Shëndetësisë dhe Mbrojtjes Sociale dhe Komisionit për Punën, Çështjet Sociale dhe Shëndetësinë, ku shpreh shqetësimet e tij në lidhje me projektligjin e ri “Për Barazinë Gjinore”.
KNSH-ja, e përbërë nga Komuniteti Mysliman, Kisha Orthodhokse Autoqefale, Kisha Katolike, Kryegjyshata Botërore Bektashiane dhe Vëllazëria Ungjillore, kërkon rishikimin e projektligjit.
Në shkresën dërguar institucioneve, që shoqërohet me raportin analitik të grupit të ekspertëve të Këshillit Ndërfetar, KNSH thekson se disa nga ndryshimet e propozuara sjellin pasiguri ligjore, rrezik interpretimi të gabuar dhe mund të krijojnë vështirësi në zbatimin praktik të ligjit nga institucionet publike dhe private.
Këshilli Ndërfetar thekson se është plotësisht në favor të respektit dhe barazisë së çdo individi, por thekson se çdo ndërhyrje ligjore duhet të ruajë ekuilibrin midis të drejtave individuale, vlerave shoqërore dhe natyrës biologjike të njeriut. Në shkresë theksohet se ligji nuk duhet të bëhet instrument imponimi ideologjik apo kulturor, veçanërisht në fushën e edukimit të fëmijëve.
Këshilli Ndërfetar i Shqipërisë i bën thirrje institucioneve shtetërore të zhvillojnë një proces të gjerë konsultimi publik përpara miratimit të çdo nisme të re ligjore, duke përfshirë të gjitha palët e interesuara. Komunitetet fetare shprehin gatishmërinë për të kontribuar në një dialog të hapur e konstruktiv, me qëllim mbrojtjen e dinjitetit njerëzor, forcimin e paqes dhe mirëkuptimit në shoqëri.
Leave a Reply