Ministrja për Evropën dhe Punët e Jashtme, Elisa Spiropali, ka zhvilluar një telefonatë me ministrin e Jashtëm të Izraelit, Gideon Saar, ku në fokus të diskutimeve ishte Faza e Parë e Planit të Paqes dhe lirimi i shumëpritur i pengjeve. Përmes një postimi në rrjetin social, Spiropali ka bërë të ditur se gjatë bisedës u vlerësua rëndësia humanitare dhe simbolike e këtij momenti në përpjekjet globale për paqe.
Spiropali e cilësoi planin e paqes si një “triumf të jetës, dinjitetit dhe solidaritetit njerëzor”, duke theksuar se marrëveshja është frymëzuar nga përpjekjet ndërkombëtare të udhëhequra nga ish-Presidenti amerikan, Donald Trump.
“Një Agim i Ri për Paqen dhe Njerëzimin. Në prag të lirimit të shumëpritur të pengjeve, pata një bisedë thellësisht domethënëse me homologun tim të nderuar izraelit, Gideon Sa’ar. Reflektuam mbi faktin se Faza I e Planit të Paqes shënon një hap thelbësor humanitar…”, shkruan Spiropali në postimin e saj.
Ministrja gjithashtu pranoi ftesën zyrtare për të vizituar Izraelin javën e ardhshme, duke riafirmuar miqësinë mes dy vendeve dhe angazhimin për të thelluar bashkëpunimin ekonomik dhe diplomatik.
“Me kënaqësi pranova ftesën e tij të përzemërt për të vizituar Izraelin javën e ardhshme, ndërsa riafirmuam miqësinë midis Shqipërisë dhe Izraelit, si dhe angazhimin tonë të përbashkët për të thelluar bashkëpunimin, zgjeruar partneritetin ekonomik dhe për të punuar për një të ardhme më të ndritur e më paqësore. Uroj që ky moment t’i kujtojë botës se edhe në kohët më të vështira, vizioni dhe humanizmi mund të triumfojnë”, thekson ajo.
Leave a Reply