Udhëheqësi rus, Vladimir Putin përshëndeti marrëdhëniet e vazhdueshme miqësore midis vendit të tij dhe Sirisë, ndërsa u takua me presidentin e përkohshëm sirian Ahmed al-Sharaa në Moskë. Putin tha se Siria po përjetonte kohë të vështira, por zgjedhjet e fundit parlamentare kishin forcuar bashkëpunimin midis të gjitha forcave politike atje.
Ai shtoi se fitorja e bllokut pro-presidencial ishte një sukses i madh – pasi kontribuoi në konsolidimin e shoqërisë.
Kjo është vizita e parë zyrtare e al-Sharaa në Rusi – që kur ai mori detyrën dhjetorin e kaluar, pasi udhëhoqi një aleancë rebele që rrëzoi ish-sundimtarin Bashar al-Assad pas shumë vitesh luftë civile.
Rusia ishte një nga aleatët më të ngushtë të vendit nën drejtimin e al-Assad. Ish-presidenti u strehua në Rusi pas rrëzimit të tij, ku ai dhe familja e tij morën azil. Sipas burimeve të sigurisë siriane, al-Sharaa ka planifikuar t’i kërkojë Putinit gjatë vizitës së tij të ekstradojë al-Assad.
Al-Sharaa shoqërohet nga ministri i Jashtëm, Asaad al-Shaibani dhe ministri i Mbrojtjes Murhaf Abu Qasra.
Zëdhënësi i Kremlinit, Dmitry Peskov, njoftoi para takimit të tyre se bazat ushtarake të Rusisë në Siri do të ishin pjesë e diskutimeve.
Putin, i cili e mbështeti ushtarakisht al-Assad për vite me radhë në luftën e tij kundër sundimtarëve aktualë, synon t’i mbajë bazat e Rusisë në Siri. Porti në Tartus është baza e vetme e Rusisë në bregdetin e Mesdheut dhe për këtë arsye ka një rëndësi strategjike.
Moska ka përdorur gjithashtu bazën ajrore “Khmeimim”, në juglindje të qytetit të Latakias për bombarduesit dhe helikopterët e saj.
Al-Sharaa deklaroi se Siria respektonte të gjitha marrëveshjet e arritura me Moskën.
“Ne mbajmë marrëdhënie të ngushta me Rusinë dhe një pjesë e konsiderueshme e sektorit të energjisë sirian mbështetet në ekspertizën ruse”, tha presidenti i përkohshëm, Al-Sharaa.
Leave a Reply