Kryeministrat e Shqipërisë dhe Kosovës, Edi Rama dhe Albin Kurti, kanë konfirmuar jo të mira mes tyre, ndërsa janë përplasur publikisht për protestën e paralajmëruar në Tiranë në mbështetje të Ushtrisë Çlirimtare të Kosovës e ish-drejtuesve të saj që ndodhen në Hagë dhe rolin e Gjykatës Speciale për Kosovën.
Ishte Lëvizja Vetëvendosje e Kryeministrit të Kosovës, Albin Kurti, që teksa ka shprehur mbështetjen e saj për protestën që do të mbahet të premten, më 17 tetor, në Tiranë, në përkrahje të ish-krerëve të Ushtrisë Çlirimtare të Kosovës, qortoi qëndrimet e Edi Ramës. “Gjykata Speciale nuk erdhi vetvetiu, por nisi që në vitin 2008 nga një rezolutë e propozuar në Këshillin e Evropës nga kryesuesi i deputetëve të Federatës Ruse, Konstantin Kosachev, por që u miratua si rezolutë me propozim të senatorit Dick Marty në vitin 2011”, thuhet në deklaratën e saj.
SIpas Lëvizjes, “UÇK-ja nuk ka qenë ndërmarrje kriminale dhe nuk ka pasur struktura të tilla. Përkundrazi, për krime të luftës duhet të gjykohet Serbia, ajo është shkaktarja e gjenocidit dhe krimeve masive e sistematike ndaj popullit të Kosovës”. “Vetëvendosje” thekson se për të ecur përpara si shtet e komb “duhet të reflektojmë mbi qëndrimet tona karshi kësaj Gjykate në kohën kur u themelua”, duke përmendur se “shumë nga ata që sot dalin në kundërshtim me Gjykatën Speciale, dje ishin lobuesit më të mëdhenj për themelimin e saj”.
Në këtë kontekst, Lëvizja përmend edhe kryeministrin e Shqipërisë. “Një shembull i qartë është vet Kryeministri aktual i Shqipërisë, Edi Rama, i cili madje kishte ardhur në Kosovë në vizitë emergjente me helikopter për të bindur palët këtu që të votonin pro themelimit të kësaj Gjykate”, thuhet në komunikatë.
“Lëvizja Vetëvendosje, si atëherë më 2015, si sot më 2025, është e palëkundur se drejtësia duhet të ndriçojë të vërtetën dhe e vërteta nuk ka si të jetë ndryshe veçse në anën e luftës dhe përpjekjes së paepur të popullit të Kosovës për çlirim e pavarësi,” thuhet më tej. Vetëvendosje apeloi që “institucionet e Shqipërisë si shtet anëtar i OKB-së, i Këshillit të Evropës, i OSBE-së, i NATO-s e shumë pranë Bashkimit Evropian, ta ngrejnë këtë çështje në forume ndërkombëtare, e jo në sheshin ‘Skënderbe’ në Tiranë”.
Ndërkohë ka mbërritur sot reagimi i Kryeministrit Rama, duke e akuzuar Lëvizjen Vetëvendosje se nuk ka pranuar për shumë kohë as himnin e Kosovës dhe e do ish-Presidentin Hashim Thaçi në qelitë e Hagës. “Lëvizja Vetëvendosje më paska kushtuar një çarçaf të gjatë, ku shkruan se përpara 10 vjetësh unë paskam qenë pro kurse ajo paska qenë kundër Gjykatës Speciale… Ndërkohë unë e kam denoncuar farsën ndaj Hashim Thaçit e të tjerëve kurdo e kudo ka qenë rasti a nevoja, ndërsa Lëvizja dihet se sa ka lëvizur në atë drejtim”, shprehet Rama. Ai sqaron se nuk është “në asnjë lloj gare me Lëvizjen”.
“Më vjen keq që Lëvizja i ngatërron marrëdhëniet institucionale të Kosovës me Shqipërinë në çorbën e balotazheve komunale, ndërsa për qëndrimet e para 10 vjetëve – kur ajo nuk njihte as himnin e Kosovës e jo më pafajësinë e Hashim Thaçit, të cilin do ta donte përjetësisht në Hagë – i kujtoj Lëvizjes se Gjykata Speciale u ngrit për trafikun e organeve, jo për të marrë peng Presidentin e Republikës së Kosovës”, u shpreh Kryeministri. Më tej, shefi i qeverisë tha se nuk do të jetë folës në protestën e 17 tetorit.
“Unë as nuk jam organizator e as nuk jam folës i protestës gjithëkombëtare “Drejtësi për Çlirimtarët”, të cilën e mbështes megjithë zemër e do t’i bashkohesha si pjesëmarrës i thjeshtë, nëse nuk do të isha i vetëdijshëm se çdo politizim me dashje ose jo i asaj nisme, do të dëmtonte qëllimin dhe popullaritetin e saj”, tha Rama.
Leave a Reply