Protokolli, veçantia e vizitës së Papës në Itali

Vizita zyrtare e Papës në Itali është më e veçanta dhe më e çuditshmja në aspektin protokollar e ceremonial dhe në kontaktet ndërshtetërore, pasi Ati i Shenjtë, ndonëse drejtues shpirtëror i katolikëve në mbarë botën, ka njëkohësisht funksionin e kreut të shtetit.

Zyrtarisht Papa është Kryetar i Shtetit të Vatikanit (me sipërfaqe 0.44 km katror dhe rreth 882 banorë në vitin 2024), zgjidhet në detyrë në mënyrë të përjetshme dhe drejton të tre pushtetet (legjislativ, ekzekutiv dhe gjyqësor).

Për rrjedhojë, kur Papa Leoni XIV vizitoi Italinë dy ditë më parë, me ftesë të Presidentit Matarela, siç e kërkon protokolli në rastet e udhëtimit me rrugë tokësore, delegacioni i Vatikanit u prit në hyrje të shtetit nga zëvendëskryeministri dhe ministri i Jashtëm italian, Tajani, duke improvizuar një pikë të kalimit të kufirit.

Kufiri mes dy shteteve ndodhet vetëm pak metër larg Obeliskut në qendër të Sheshit “Shën Pjetër”, ku u zhvillua edhe ceremonia e pritjes së Kreut të Shtetit të Vatikanit. Vetëm nga ai moment, Ati i Shenjtë u mor “në dorëzim” nga protokolli dhe forcat e sigurisë italiane për t’u drejtuar në Pallatin “Quirinale” (selia e Presidentit të Republikës Italiane).

Papa e kalon shpeshherë pa protokoll e ceremonial vijën e kufirit ndërshtetëror Vatikan-Itali kur viziton kishat dhe bazilikat e Romës apo kur zhvendoset në vilat dhe kështjellat e pushimit, si dhe në qytete të ndryshme të Italisë.

Një procedurë e veçantë ndiqet kur ai përdor aeroportet e Romës për udhëtime jashtë shtetit, pasi këto lëvizje cilësohen si zyrtare dhe Papa përcillet apo pritet nga një zyrtar i lartë i qeverisë së Romës, duke u vlerësuar çdo herë si kalim tranzit i një kryetari shteti të huaj.