Presidenti i SHBA-së, Donald Trump, deklaroi pas takimit me homologun e tij ukrainas, Volodimir Zelenski se është koha për paqe mes Rusisë dhe Ukrainës dhe lufta nuk duhej të kishte nisur kurrë. Trump e komentoi takimin me një postim në “Truth”, duke këmbëngulur se i duhet dhënë fund luftës, ndërsa ai parashikon të takohet me Presidentin Putin në javët e ardhshme.
Vetë Zelenski, pas takimit, nuk pranoi të fliste për kërkesën e bërë për raketat me rreze të gjatë veprimi, duke konfirmuar se nuk ka një marrëveshje.
Ndërkohë përpara takimit Trump paralajmëroi se sistemi “Tomahawk”, raketat me rreze të gjatë veprimi, mund të shkaktonin përshkallëzim të konsiderueshëm – në një luftë që ai do të preferonte t’i jepte fund. “Ne do të bisedojmë për raketat “Tomahawk”, dhe do të preferonim shumë më tepër që ata të mos kishin nevojë për “Tomahawk”. Do të preferonim shumë më tepër që lufta të mbaronte”, tha sot Trump në Shtëpinë e Bardhë gjatë takimit me udhëheqësin ukrainas. “Ato janë armë shumë të fuqishme, por janë armë shumë të rrezikshme. Dhe kjo mund të nënkuptojë një përshkallëzim të madh dhe se shumë gjëra të këqija mund të ndodhin”, shtoi Trump.
Presidenti amerikan gjithashtu vuri në dukje në mënyrë të përsëritur se ishte e rëndësishme që SHBA-ja të kishte një furnizim të mjaftueshëm me raketat e veta. “Ne kemi nevojë për raketat “Tomahawk”. Nuk duam të japim armë që na duhen për të mbrojtur vendin tonë”, tha ai. Trump sugjeroi që lufta midis Rusisë dhe Ukrainës mund të përfundonte pa to. “Shpresojmë se do të jemi në gjendje t’i japim fund luftës pa menduar për raketat “Tomahawk”, tha Trump.
Pas takimit me Trump, Zelenski zhvilloi një seri konsultimesh me liderët eiropianë dhe shefin e NATO-s mbi hapat që do të hidhen, ndërsa pranoi se pika e kufijve ishte shumë delikate në negociata.
Leave a Reply