Armëpushim Afganistan-Pakistan me ndërmjetësimin turk

“Milli Istihbarat Teskilati” – #MIT, shërbimi turk i inteligjencës, luajti një rol kyç në vendosjen e armëpushimit të menjëhershëm mbrëmjen e shkuar mes Afganistanit dhe Pakistanit, pas negociatave intensive që zgjatën 14 orë në #Doha të Katarit.

Afganistani dhe Pakistani, që prej ditësh kishin nisur një konflikt ushtarak në zonat kufitare, ranë dakord të ndalojnë luftimet dhe të mblidhen në një takim të ardhshëm më 25 tetor në Stamboll.

Në negociatat e Katarit ishte i pranishëm edhe shefi i MIT, Ibrahim Kalin, krahas ministrave të Mbrojtjes dhe drejtuesve të inteligjencës së Kabulit dhe Islamabadit. Gjatë negociatave, disa liderë botërorë u mbajtën të informuar deri në orët e vona të mbrëmjes, përfshirë Presidentin turk, Rexhep Taip Erdogan.

Angazhimi i MIT për negociimin e një armëpushimi mes palëve nisi më 11 tetor, kur drejtuesit e shërbimeve të inteligjencës së Turqisë, Pakistanit dhe Katarit u takuan në Stamboll, duke mbajtur njëkohësisht kontakte me palën afgane.