Nga Elton METAJ
Në marrëdhëniet ndërkombëtare shpeshherë ka një diskutim mbi peshën dhe ndikimin e kontakteve ndërpersonale në diplomaci, veçanërisht në momente kyçe dhe të rëndësishme të historisë botërore. A mund ta ndikojë një komunikim ndërpersonal pozitiv një detyrë shtetërore të një rëndësie madhore? A mund të “zbuten” edhe politikanët e ish-luftëtarët më të ashpër nga një qasje miqësore në momente delikate të vendimeve të mëdha?
Rasti i fundit nga negociatat për paqen në Gaza na dëshmon se elementët personalë apo familjarë mund ta ndryshojnë ndjeshëm klimën e bisedimeve të vështira, ku lëshimet duken të pamundura.
Detajet e reja që kanë dalë në dritë nga negociatat për marrëveshjen e paqes në #Gaza, zhvilluar në Sharm El Sheik të Egjiptit 10 ditë më parë mes delegacioneve të Izraelit dhe Hamasit, me ndërmjetësimin e SHBA-së, Egjiptit, Katarit dhe Turqisë, na lënë të kuptojmë se aspekti njerëzor ka patur domethënie jo të vogël.
I dërguari i posaçëm i Presidentit amerikan, Steve Witkoff dhe dhëndri i Presidentit, Jared Kushner, përpara nisjes për në Egjipt, mësohet se morën mandat nga Donald J. Trump për t’u takuar direkt me krerët e Hamas, nëse kjo do të ishte e nevojshme gjatë negociatave. Një vendim i rrallë për zyrtarët e lartë amerikanë për të patur takime direkte me një organizatë të klasifikuar si terroriste.
Dhe kështu ndodhi. Negociatorët nga Katari e informuan delegacionin amerikan që ndodhej në një vilë në hotelin “Four Seasons”, për ngecjen e negociatave dhe kërkuan një takim direkt mes palëve. Pak minuta më pas, Witkoff dhe Kushner hynë në një vilë tjetër në rezortin turistik në Detin e Kuq, ku ndodheshin krerët e shërbimeve inteligjente të Egjiptit dhe Turqisë, si dhe katër drejtues të Hamasit. Mes tyre, më i rëndësishmi, Khalil al-Hayya. Vetëm 3 javë më parë, ai i shpëtoi një përpjekjeje të Izraelit për ta vrarë në Katar, ku humbi jetën djali i tij Himam.
#Witkoff ka rrëfyer në një intervistë së fundmi se i kishin shprehur ngushëllimet drejtuesit të Hamasit për humbjen e të birit. Gjest që është vlerësuar nga al-Hayya. “I thashë atij se edhe unë e kam humbur djalin dhe ne të dy i takojmë një grupi shumë të keq, prindër që kanë varrosur fëmijët”, u shpreh Witkoff. Djali i Witkoff, Endrju ka ndërruar jetë në moshën 22-vjeçare nga mbidoza e drogës.
Jared Kushner e rrëfeu me emocion këtë moment të bisedës mes Steve Witkoff, i dërguari i Presidentit Trump, dhe Khalil al-Hayya, drejtues i Hamas. Një bisedë e paimagjinueshme deri pak ditë më parë, kur Izraeli nisi avionët F35 drejt Katarit për ta ekzekutuar Khalil al-Hayya dhe Hamas mbetej një grupim terrorist për politikën amerikane. “Kur Steve dhe ai folën për djemtë e tyre, gjithçka u kthye nga një negociatë me një grup terrorist, te dy qënie njerëzore që tregonin dhembshuri për njëri-tjetrin”, tha Kushner.
Pas 45 minutash takim, palët dolën me një marrëveshje për të mbështetur planin me 20 pika të Trumpit për armëpushimin dhe paqen në Gaza. Një sukses diplomatik, kryesisht për dy kryenegociatorët e SHBA dhe Hamas, dy baballarë që kanë varrosur djemtë e tyre, si shumë të tjerë në Izrael e Gaza. Ata hodhën themelet për paqen e shumëdëshiruar.
Leave a Reply