Gjermania dhe Islanda kanë rënë dakord të thellojnë bashkëpunimin e tyre ushtarak, në kushtet e rritjes së kërcënimeve ruse në rajonin e veriut.
Forcat e armatosura gjermane synojnë të krijojnë një pikë mbështetjeje në ishullin vullkanik në veri të largët, ku do të ankorohen anije luftarake, nëndetëse dhe mjete furnizimi.
Një memorandum mirëkuptimi, i nënshkruar në Rekjavik, fokusohet në logjistikën detare, tha ministri gjerman i Mbrojtjes Boris Pistorius t pas takimit me ministren e Jashtme islandeze, Þordís Kolbrun Reykfjoro Gylfadottir.
Islanda, anëtare themeluese e NATO-s që prej vitit 1949, mbetet ende pa ushtri të rregullt. Gjermania kërkon të përfitojë nga infrastruktura moderne portuale e vendit dhe po shqyrton gjithashtu dislokimin e përkohshëm të avionëve zbulues P-8A Poseidon.
“Këtu në veri të largët, Islanda po jep një kontribut jetik për mbrojtjen e krahut verior të aleancës”, tha Pistorius, në fillim të një turi që do ta çojë edhe në Kanada dhe Britaninë e Madhe.
“Gjermania është, nga këndvështrimi im, forca udhëheqëse në forcimin e sigurisë dhe mbrojtjes së Europës”, u shpreh Gylfadottir. Ajo theksoi planet për bashkëpunim më të ngushtë me forcat ajrore dhe marinën gjermane, si dhe angazhimin e përbashkët kundër sulmeve hibride dhe kërcënimeve ndaj komunikimeve në internet.
Leave a Reply