Në raundin e parë të zgjedhjeve lokale në Republikën e Maqedonisë së Veriut, janë zgjedhur kryetarë komunash në 43 komuna nga gjithsej 80 komuna dhe qyteti i Shkupit, sipas rezultateve paraprake të Komisionit Shtetëror të Zgjedhjeve (KShZ).
VMRO-DPMNE-ja ka fituar poste të kryetarit në 32 komuna, koalicioni VLEN në pesë komuna, koalicioni AKI në katër, ndërsa LSDM ka fituar në tre komuna në raundin e parë të zgjedhjeve.
Zgjedhjet nuk kanë arritur të jenë të vlefshme në tri komuna Gostivar, Qendër Zhupë, Vrapçisht dhe Mavrovë-Rostushë, pasi nuk kanë marrë pjesë të paktën një e treta e votuesve të regjistruar, që është minimumi ligjor për t’u konsideruar se zgjedhjet janë të vlefshme.
Në raundin e parë, kryetar komune zgjidhet kandidati që merr shumicën e votave të votuesve që kanë dalë në zgjedhje, me kusht që në zgjedhje të kenë marrë pjesë të paktën një e treta e votuesve të regjistruar në listën zgjedhore përkatëse. Nëse në raundin e parë të votimit për kryetar komune ose për qytetin e Shkupit nuk del të paktën një e treta e votuesve të regjistruar në listën zgjedhore, i tërë procesi zgjedhor përsëritet për atë komunë përkatëse.
Zgjedhjet për kryetarë komunash zhvillohen sipas modelit mazhoritar, ndërsa zgjedhjet për anëtarë të këshillave sipas modelit proporcional, në një raund të vetëm.
Raundi i dytë i zgjedhjeve lokale do të mbahet më 2 nëntor.
Leave a Reply