Ministrja për Evropën dhe Punët e Jashtme të Shqipërisë, Elisa Spiropali, ndodhet për një vizitë zyrtare në Izrael, në përgjigje të ftesës së bërë nga homologu i saj, Gideon Sa’ar, pak ditë më parë.
Ndalesën e saj të parë në Izrael, ministrja Spiropali e pati në vendndodhjen e Festivalit Nova, në homazh të viktimave të 7 tetorit 2023. Spiropali theksoi se “kthimi i të gjitha pengjeve në shtëpi do të ishte një hap vendimtar për mbrojtjen e dinjitetit njerëzor”. “Sulmi terrorist i Hamasit u mori jetën mbi 1200 civilëve, plagosi dhe ndau nga familjet qindra të tjerë”, tha ministrja.
“Shqipëria mbështet marrëveshjen e paqes, arritur së fundmi me ndërmjetësimin e Presidentit Trump, si e vetmja mënyrë për stabilitet në Lindjen e Mesme dhe bashkëjetesën në siguri e dinjitet për të dy popujt”, deklaroi Spiropali nga Izraeli.
Gjatë qëndrimit të saj, Spiropali do të pritet në një takim nga ministri Sa’ar dhe do të zhvillojë bisedime edhe me kryetarin e Kuvendit të Izraelit, Amir Ohana, ku në fokus do të jenë zhvillimet rajonale, bashkëpunimi ekonomik, inovacioni dhe interesat strategjike të përbashkëta.
Gjatë vizitës, Spiropali pritet të ndalet edhe në memorialin “Yad Vashem”, qendrën e përkujtimit të Holokaustit, ku shqiptarët nderohen ndër popujt që rrezikuan jetën për të shpëtuar hebrenjtë gjatë Luftës së Dytë Botërore.
Leave a Reply