Kamila, respektim rigoroz i protokollit të Vatikanit

Në takimin e saj me Papa Leonin XIV-të në Vatikan, Mbretëresha Kamila ka ndjekur në mënyrë rigoroze protokollin e Selisë së Shenjtë edhe për veshjen, si në pritjen private të dhënë nga Ati i Shenjtë, ashtu edhe në lutjen ekumenike, në Kapelën Sikstina mes afreskeve të Mikelanxhelos.

Siç e kërkon protokolli, zonjat e familjeve mbretërore, kur nuk janë katolike, duhet të përdorin veshje në ngjyrë të zezë gjatë takimit me Papën. Kamila kishte zgjedhur për vizitën historike në Vatikan të vendoste një vello të gjatë në formën e një manteli dhe një lloj kurore me gjethe të zeza.

Krahas detyrimit protokollar për ngjyrën e veshjes dhe mbulimin e kokës para Papës, pra vendosjen e vellos, Kamila respektoi edhe një kërkesë tjetër të ceremonialit shumëshekullor të Vatikanit. Mbretëresha e Anglisë nuk shfaqi bizhuteri shumë të dukshme apo simbole të tjerë në veshje. Fustani i saj, i realizuar nga Fiona Clare, mbante vetëm një spilë me diamantë, që i përkiste Mbretëreshës Elizabeta II, në formën e një kryqi.