Një zyrtar i lartë amerikan ka paralajmëruar ashpër kryeministrin izraelit Benjamin Netanjahu, se nëse lejon që marrëveshja e armëpushimit mes Izraelit dhe Hamasit të dështojë, ai do të përballet me pasoja serioze nga presidenti amerikan Donald Trump, raportoi televizioni izraelit Channel 12.
Duke folur në hebraisht për “Channel 12”, korrespondenti i Axios tha se zyrtari amerikan e kishte paralajmëruar se Netanjahu “po ecën në një fije shumë të hollë me presidentin Trump. Nëse vazhdon kështu, do ta prishë marrëveshjen dhe nëse e prish marrëveshjen, Donald Trump do ta ndëshkojë.”
Këto komente vijnë mes tensioneve në rritje midis Uashingtonit dhe Tel Avivit, pas vendimit të parlamentit izraelit, Knesset, për të avancuar projektligje të lidhura me aneksimin e pjesëve të Bregut Perëndimor të pushtuar.
Sipas raportit, zëvendëspresidenti amerikan JD Vance, i cili përfundoi një vizitë diplomatike në Izrael të enjten, mbeti i habitur pasi mësoi se Knesset kishte miratuar një ditë më parë dy projektligje jo të detyrueshme që lidhen me aneksimin.
Duke folur para gazetarëve në aeroportin Ben Gurion të Tel Avivit para nisjes, Vance e kritikoi votimin, duke thënë: “Nëse kjo ishte një manovër politike, është një veprim shumë i pamend. Personalisht, e konsideroj fyese.”
Leave a Reply