Hetimet për Ballukun, Rama: Drejtësia ka punën e vet

Kryeministri Edi Rama është pyetur nga Deutche Welle, mbi lajmin e publikuar në disa media se zëvendëskryeministrja, njëherësh ministre e Infrastrukturës dhe Energjisë, Belinda Balluku është thirrur të hënën nga Prokuroria e Posaçme, SPAK.

Kreu i qeverisë tha se derisa çështje të caktuara të marrin një vendim të prerë nga drejtësia, të gjithë njerëzit janë të pafajshëm.

“Nuk kam asnjë koment për asnjë rast, sepse siç e kam thënë, ne kemi punën tonë dhe drejtësia ka punën e vet dhe deri kur çështje të caktuara marrin formën e tyre të prerë, të gjithë njerëzit janë të pafajshëm dhe janë të padënueshëm nga gjykata popullore e politikës dhe e mediave që i shërbejnë politikës”, u shpreh Rama.

Rama ndodhet në Berlin për të marrë pjesë në Global Dialogue (BGD), forumi ndërkombëtar i nivelit të lartë që zhvillohet çdo vit në kryeqytetin e Gjermanisë.