Nga Elton METAJ
Një kabllogram i mbërritur nga Departamenti i Shtetit në Ambasadën Amerikane në Shqipëri tre javë ka shkaktuar jo pak diskutime në qarqet diplomatike dhe në kanalet zyrtare në Tiranë. Mesazhi i Departamentit të Shtetit u kërkonte misioneve dhe ambasadave amerikane në botë të lobonin kundër një projekt-rezolute në Kombet e Bashkuara për heqjen e embargos ndaj Kubës.
Asambleja e Përgjithshme e Kombeve të Bashkuara do të diskutojë pas pak ditësh një rezolutë të përsëritur që kërkon heqjen e sanksioneve ekonomike ndaj ishullit të dominuar për disa dekada të shkuara nga Fidel Kastro. Rezulota është tentuar prej vitit 1992 brenda OKB-së dhe ka gjetur mbështetje të madhe mes vendeve të ndryshme anëtare.
Megjithatë, këtë vit duket se gjërat kanë ndryshuar edhe me ndryshimin e administratës në Shtëpinë e Bardhë. Qasja e Presidentit Trump ndaj vendeve në Detin e Karaibeve nuk është më ajo e administratës së shkuar. Tashmë SHBA po investohet edhe ushtarakisht në këtë rajon, duke mbajtur si flamur të politikës së jashtme për jugun e Amerikës, luftën ndaj karteleve të drogës.
Specifikisht për Kubën, qëndrimi i Uashingtonit është i ashpër, duke e renditur në listën e vendeve që sponsorizojnë terrorizmin. SHBA ka forcuar sanksionet financiare dhe ka shtrënguar lëvizjen e kubanezëve, pa lënë jashtë ndëshkimit edhe vendet e tjera që pranojnë mjekë nga Kuba. Gjithashtu, qasja e ashpër e Shteteve të Bashkuara ndaj Kubës është ndikuar edhe nga raportimet e shërbimeve të inteligjencës se rreth 5 mijë kubanë i janë bashkuar ushtrisë ruse në luftën e Ukrainës.
Në votimin e vitit të shkuar, rezoluta pro-Kubës mori në OKB 187 vota pro, ku SHBA dhe Izraeli ishin të vetmet vende që votuan kundër, ndërsa Moldavia abstenoi. Rezoluta “Mbi nevojën e përfundimit të embargos ekonomike, tregtare dhe financiare të vendosur nga Shtetet e Bashkuara kundër Kubës” mori në votimin e vitit të shkuar edhe miratimin e Shqipërisë.
Kabllogrami i fillimtetorit i Departamentit të Shtetit udhëzon ambasadat dhe misionet diplomatike amerikane që t’u kërkojnë qeverive të shteteve të ndryshme, kryesisht atyre aleate, ta ndryshojnë votën në sesionin e 28-29 tetorit të Asamblesë së Përgjithshme. Sipas udhëzimit të Uashingtonit, do të ishte e preferuar që këto vende të votojnë kundër, ashtu si SHBA, por do të vlerësohej edhe abstenimi. Qëllimi i diplomacisë amerikane është që të dëshmohet një ulje e ndjeshme e votave pro rezolutës. Pra një pakësim i mbështetjes për heqjen e embargos.
Debati dhe votimi në Asamblenë e OKB-së janë vetëm pak ditë larg dhe ende nuk ka një qëndrim publik të Tiranës zyrtare, nëse do të ketë ose jo ndryshim të votës për embargon ndaj Kubës. Një provë jo e lehtë diplomatike, nëse mbajmë parasysh qëndrimet e Bashkimit Europian kundër vijimit të embargos ndaj ishullit komunist.
Leave a Reply