Kreu i Prokurorisë së Posaçme kundër Korrupsionit dhe Krimit të Organizuar (SPAK) Altin Dumani, prezantoi sot në Kuvend raportin vjetor, duke vënë në dukje progresin e arritur në hetimin e korrupsionit në nivele të larta dhe në luftën kundër krimit të organizuar, por edhe sfidat që mbeten për t’u adresuar.
Dumani theksoi se gjatë vitit 2024 SPAK ka ndjekur me prioritet rekomandimet e Bashkimit Europian dhe rezolutën e Kuvendit në drejtim të forcimit të luftës kundër korrupsionit dhe kriminalitetit. Ai vuri në dukje se janë marrë në konsideratë jo vetëm treguesit sasiorë, por sidomos ata cilësorë, që lidhen me profesionalizmin e hetimeve dhe besimin e publikut.
Sipas Dumanit, gjatë vitit 2024 numri i prokurorëve të posaçëm u rrit nga 17 në 20, ndërsa u shtua ekspertiza e Byronë Kombëtare të Hetimit dhe u intensifikuan trajnimet ndërkombëtare.
Ky zhvillim, sipas tij, solli një rritje me 8% të çështjeve nën hetim dhe me 21% të numrit të personave të hetuar krahasuar me vitin 2023, ndërkohë që numri i procedimeve të reja shënoi një ulje me 15%, si shenjë e konsolidimit të çështjeve të mëdha ekzistuese.
“Janë hetuar 33 ish-zyrtarë të lartë, prej të cilëve 19 janë dërguar në gjykatë, që përbën 52,9% të rasteve. Totali i çështjeve në hetim për korrupsion është rritur me rreth 8% krahasuar me një vit më parë”, deklaroi Dumani
Një nga treguesit më domethënës, sipas kreut të SPAK, është rritja e ndjeshme e sekuestrimeve dhe konfiskimeve të aseteve kriminale, që arritën vlerën rekord prej 65.5 milionë eurosh, një rritje prej 60% krahasuar me vitin 2023.
Këto përfshijnë pasuri të paluajtshme, llogari bankare dhe madje edhe asete në formën e kriptovalutave.
Në fushën e bashkëpunimit ndërkombëtar, SPAK ka krijuar 10 skuadra të reja të përbashkëta hetimore me agjenci si Interpol, Europol dhe Eurojust, ndërsa vijon puna me 27 skuadra ekzistuese.
Dumani bëri të ditur se në nëntor 2024 u miratua udhëzimi i përgjithshëm për hetimet financiare, që unifikon standardet e punës midis prokurorëve, BKH-së dhe sektorit të hetimit financiar, duke forcuar ndjeshëm ndjekjen e pasurive me origjinë kriminale.
Në fund të vitit 2024, SPAK numëronte 114 punonjës, ndërsa BKH ishte në proces rekrutimi për 102 vende vakante. Procesi për zgjedhjen e drejtorit të ri të BKH-së ndodhet në fazën përfundimtare.
Megjithatë, ai paralajmëroi se pavarësia e institucionit duhet të mbrohet nga presionet e jashtme dhe se duhen bërë ndryshimet e nevojshme ligjore për të forcuar strukturën, statusin e prokurorëve pas mandatit dhe për të siguruar një mbështetje më të madhe institucionale në vitet në vijim.
Në raportin e Komisionit Europian për vitin 2024, sipas Dumanit, vlerësohen rezultatet e SPAK në hetimin e rasteve të korrupsionit në nivelet më të larta dhe në mbrojtjen e interesave financiare të BE-së.
Leave a Reply