Ministri i Brendshëm i Gjermanisë, Alexander Dobrindt, ka propozuar futjen e orëve mësimore për përgatitje ndaj krizave dhe luftës në programet shkollore, për shkak të tensioneve në rritje me Rusinë. Dobrindt, anëtar i partisë së qendrës së djathtë CSU, tha për gazetën Handelsblatt se planifikon ta shtrojë këtë çështje në takimin me ministrat e brendshëm të landeve federale muajin e ardhshëm.
“Propozimi im është që nxënësit e klasave të larta gjatë një viti shkollor të zhvillojnë dy orë radhazi duke diskutuar për skenarët e mundshëm të kërcënimeve dhe mënyrat për t’u përgatitur ndaj tyre,” deklaroi Dobrindt.
Ai shtoi gjithashtu se fëmijët kanë një rol të rëndësishëm në përcjelljen e dijes brenda familjeve, dhe se ky qasje mund të ndihmojë në rritjen e ndërgjegjësimit edhe në shtëpi.
Deklaratat e Dobrindtit vijnë në një kohë kur tensionet midis vendeve evropiane dhe Rusisë janë shtuar, pasi përpjekjet e fundit të presidentit amerikan Donald Trump për të arritur një armëpushim midis Kievit dhe Moskës kanë dështuar.
Ministri konservator i Brendshëm së fundmi ka akuzuar Rusinë se po zhvillon një luftë hibride kundër Gjermanisë dhe partnerëve të saj evropianë përmes fushatave dezinformuese, operacioneve të ndikimit, sulmeve kibernetike dhe akteve të sabotimit.
Udhëheqësit politikë dhe ushtarakë gjermanë kanë paralajmëruar disa herë se vendi duhet të jetë i përgatitur për luftë deri në vitin 2029, për shkak të shqetësimeve në rritje mbi aftësitë ushtarake dhe qëllimet e Rusisë.
Leave a Reply