Rezoluta për Kubën, Shqipëria kënaq Trumpin në OKB

Nga Elton METAJ

Shqipëria i është bindur një kërkese të Shteteve të Bashkuara për të ndryshuar votën në Asamblenë e Përgjithshme të Kombeve të Bashkuara, ku u miratua një rezolutë për heqjen e embargos ndaj Kubës. Një rezolutë e votuar për 33 vite rresht me një mbështetje shumë të madhe, përfshirë Shqipërinë, por që këtë herë ndeshi në një kundërshtim të ndjeshëm nga Administrata e Presidentit Trump.

Në votimin e 29 tetorit 2025, pro heqjes së embargos ndaj Kubës ishin 165 shtete, 7 kundër dhe 12 abstenime. Kundër votuan, krahas të përhershmëve SHBA e Izrael, edhe Argjentina, Hungaria, Paraguaji, Maqedonia e Veriut dhe Ukraina. Ndërsa në grupin e abstenuesve ishin Shqipëria, Bosnje-Hercegovina, Kosta Rika, Çekia, Ekuadori, Estonia, Letonia, Lituania, Maroku, Polonia, Moldavia dhe Rumania.

Në votimin e vitit të shkuar, rezoluta “Mbi nevojën e përfundimit të embargos ekonomike, tregtare dhe financiare të vendosur nga Shtetet e Bashkuara kundër Kubës” mori në OKB 187 vota pro, ku SHBA dhe Izraeli ishin të vetmet vende që votuan kundër, ndërsa Moldavia abstenoi.

Nisur nga mbështetja e madhe për rezolutën, me anë të një kabllogrami, të mbërritur nga Departamenti i Shtetit edhe në Ambasadën Amerikane në Shqipëri në fillim të tetorit 2025, u kërkohej misioneve dhe ambasadave amerikane në botë të lobonin kundër miratimit në OKB për heqjen e sanksioneve ekonomike ndaj ishullit komunist të dominuar nga Fidel Kastro dhe pasuesit e tij. Rezulota është votuar prej vitit 1992 brenda OKB-së dhe ka gjetur mbështetje të madhe mes vendeve të ndryshme anëtare.

Kabllogrami udhëzonte përfaqësitë diplomatike amerikane që t’u kërkojnë qeverive të shteteve të ndryshme, kryesisht atyre aleate, ta ndryshojnë votën në Asamblenë e Përgjithshme. Sipas udhëzimit të Uashingtonit, do të ishte e preferuar që këto vende të votojnë kundër, ashtu si SHBA, por do të vlerësohej edhe abstenimi. Qëllimi i diplomacisë amerikane ishte që të dëshmohet një ulje e ndjeshme e votave pro rezolutës. Pra një pakësim i mbështetjes për heqjen e embargos, gjë që duket se ka ndodhur në një masë jo të madhe, me vetëm 16 shtete që kanë ndryshuar qëndrim.

Qasja e Presidentit Trump ndaj vendeve në Detin e Karaibeve nuk është më ajo e administratës së shkuar. SHBA është investuar edhe ushtarakisht në këtë rajon, duke mbajtur si flamur të politikës së jashtme për jugun e Amerikës, luftën ndaj karteleve të drogës.

Specifikisht për Kubën, qëndrimi i Uashingtonit është i ashpër, duke e renditur në listën e vendeve që sponsorizojnë terrorizmin. SHBA ka forcuar sanksionet financiare dhe ka shtrënguar lëvizjen e kubanezëve, pa lënë jashtë ndëshkimit edhe vendet e tjera që pranojnë mjekë nga Kuba. Qasja e ashpër e Shteteve të Bashkuara ndaj Kubës është ndikuar edhe nga raportimet e shërbimeve të inteligjencës se rreth 5 mijë kubanë i janë bashkuar ushtrisë ruse në luftën e Ukrainës.

Me votën në Asamble, Shqipëria ka zgjedhur në këtë mënyrë të rreshtojë qëndrimin e saj pro SHBA-së, në ndryshim nga preferenca e vendeve kryesore të Bashkimit Europian, që është shfaqur i përçarë në votim.