Tre shtetas gjermano-rusë shpallen fajtorë për spiunazh për Moskën

Një gjykatë gjermane shpalli sot fajtorë tre shtetas gjermano-rusë për spiunazh për Rusinë.

Gjykata e Lartë Rajonale e Mynihut dënoi të dyshuarin kryesor me gjashtë vjet burg, ndërsa dy të bashkëpandehurit e tij morën dënime me kusht prej gjashtë muajsh dhe një viti.

I pandehuri kryesor u shpall fajtor për shërbim si paraushtarak në një grup të armatosur terrorist që luftonte kundër forcave ukrainase në Ukrainën lindore midis viteve 2014 dhe 2016, sipas gjykatës.

Burri i hodhi poshtë akuzat në gjykatë, duke thënë se ”ishte në një lidhje me një grua nga Ukraina Lindore në atë kohë dhe nuk ishte përfshirë kurrë në luftë”.

Ai gjithashtu mohoi të ketë spiunuar për Rusinë në Gjermani midis tetorit 2023 dhe prillit 2024 dhe të ketë planifikuar akte sabotimi në infrastrukturën ushtarake dhe linjat hekurudhore.