Begaj hap garën për vakancën në Gjykatën Kushtetuese

Presidenti i Republikës, Bajram Begaj, nisi procedurën e aplikimit për plotësimin e vendit vakant gjyqtar në Gjykatën Kushtetuese të Shqipërisë.

Presidenca njoftoi se, Presidenti i Republikës, pasi u njoh me njoftimin e kryetares së Gjykatës Kushtetuese, përmes të cilit bëhet me dije se Gjykata Kushtetuese ka vendosur mbarimin e mandatit të gjyqtares Sonila Bejtja, konstatoi krijimin e vakancës.

Presidenti me cilësinë e organit të emërtesës, dhe me qëllim plotësimin e vakancës ka miratuar shpalljen e procedurës së aplikimit për emërim gjyqtari në Gjykatën Kushtetuese të Republikës së Shqipërisë.

Presidenti i Republikës fton çdo person të interesuar që plotëson kushtet dhe kriteret e parashikuara në Kushtetutë të marrë pjesë procedurën e konkurrimit të hapur publik për vakancën për gjyqtar në Gjykatën Kushtetuese dhe të paraqesë dokumentet e nevojshme pranë Institucionit të Presidentit të Republikës.

Afati i paraqitjes së kërkesës me dokumentacionin e nevojshëm është brenda datës 30 nëntor 2025.

Pas administrimit të dokumentacionit, lista e aplikuesve do të publikohet në faqen zyrtare të internetit të Institucionit të Presidentit të Republikës dhe në mjetet e informimit publik.

Më tej, dosjet respektive për secilin aplikues do t’i përcillen Këshillit të Emërimeve në Drejtësi (KED) për vlerësim sipas Kushtetutës dhe ligjit.