Gjykata Kushtetuese ka nisur shqytimin në seancë të kërkesës së kryetarit të shkarkuar të Bashkisë së Tiranës, Erion Veliaj, kundër vendimit të Këshillit të Ministrave.
Seanca nisi me një kërkesë paraprake të Presidentit të Republikës për shpalljen e moskompetencës së shqyrtimit nga Gjykata Kushtetuese të dekretit që përcakton zhvillimin e zgjedhjeve për kryebashkiak në Tiranë më 9 nëntor.
Gjykata Kushtetuese rrëzoi kërkesën paraprake të Presidentit të Republikës për shpalljen e moskompetencës së shqyrtimit nga Gjykata Kushtetuese të dekretit që përcakton zhvillimin e zgjedhjeve për kryebashkiak në Tiranë më 9 nëntor. Sipas Gjykatës, kërkesa do të shqyrtohet më tej gjatë gjykimit, bashkë me themelin e çështjes.
Sipas procedurës, relatorja Sonila Bejtja bëri prezantimin e relacionit përkatës.
Më pas kërkuesi Erion Veliaj dhe avokatët e tij paraqitën argumentet e tyre, duke i kërkuar Gjykatës Kushtetuese të rrëzojë vendimin e Këshillit të Ministrave për shkarkimin e kryebashkiakut të Tiranës.
“Fyerja më e rëndë e jetës sime shkarkimi nga bashkëpunëtorët për mungesën në detyrë. Djalin tim e kam takuar më shumë gjatë kohës në burg se sa gjatë qëndrimit në detyrë, ku i kam munguar familjes sime”, tha Veliaj.
Gjithashtu, përfaqësuesit e Presidentit të Republikës dhe qeverisë kërkuan nga Gjykata Kushtetuese të mos pranohet kërkesa e Erion Veliajt dhe avokatëve të tij. Ata këmbëngulën se Gjykata Kushtetuese nuk e ka kompetencën e shqyrtimit të kësaj cështjeje, pasi shkarkimi i Veliajt nuk është bërë për shkelje të rëndë të Kushtetutës, sipas nenit 115 të saj.
Leave a Reply