Ish-kryeministri i Shqipërisë, Fatos Nano, është ndarë sot nga jeta në moshën 73-vjeçare.
Nano ndodhej i shtruar në spital prej disa ditësh në gjendje të rëndë shëndetësore për shkak të problemeve me mushkëritë.
Fatos Nano ka qenë disa herë kryeministër i Shqipërisë deri në vitin 2005, kur ai humbi zgjedhjet parlamentare në drejtimin e Partisë Socialiste, të cilën e drejtoi prej vitit 1991.
Fatos Nano u lind më 16 shtator 1952 në Tiranë. Ai përfundoi studimet për ekonomi politike në Universitetin e Tiranës dhe më vonë ndoqi specializime jashtë vendit, përfshirë Vjenën, ku ishte studiues pranë Institutit të Studimeve Ekonomike të vendeve të Lindjes. Ai mori titullin “Doktor i Shkencave” në fushën e ekonomisë në vitin 1983, më pas “Profesor Doktor” dhe dy tituj “Doktor Honoris Causa” nga Universiteti Ndërkombëtar i Milanos dhe Universiteti i Barit në vitin 2000.
Në vitet ’80, Nano punoi në institucione ekonomike shtetërore dhe ishte ndër të paktët intelektualë që fliste për hapjen graduale të ekonomisë shqiptare. Në vitin 1991 u emërua kryeministër dhe në qershor 1991, gjatë Kongresit të 10-të të Partisë së Punës, partia u rilind si Partia Socialiste e Shqipërisë, me Fatos Nanon kryetar të parë. Ai e orientoi PS-në drejt një modeli socialdemokrat perëndimor, duke përfshirë intelektualë të rinj dhe duke e integruar partinë në Internacionalen Socialiste.
Në vitin 1993, Nano u arrestua nga qeveria e Sali Berishës për akuza politike dhe qëndroi në burg rreth katër vjet, duke udhëhequr partinë nga qelia dhe duke e përgatitur PS-në për rikthim në pushtet. Pas krizës së vitit 1997 dhe rënies së skemave piramidale, tre muaj pasi kishte dalë nga burgu, Nano udhëhoqi socialistët drejt rikthimit në pushtet.
Leave a Reply