Presidenti amerikan, Donald Trump, tha se presidenti kinez Xi Jinping i ka dhënë atij garanci se Pekini nuk do të ndërmarrë asnjë veprim për bashkimin e Tajvanit me territorin kinez gjatë periudhës së presidencës së tij, sipas AP.
Trump u shpreh se çështja e Tajvanit nuk është diskutuar drejtpërdrejt në takimin e tij me Xi-në të enjten në Korenë e Jugut, ku fokusi kryesor ishte tensioni tregtar mes Shteveve të Bashkuara dhe Kinës. Megjithatë, ai theksoi se është “plotësisht i bindur” që Kina nuk do të ndërmarrë asnjë veprim ndaj Tajvanit gjatë qëndrimit të tij në pushtet.
“Ai dhe njerëzit e tij e kanë thënë hapur se nuk do të bëjnë asgjë ndërkohë që presidenti Trump është në detyrë, sepse e dinë çfarë pasojash do të ketë”, deklaroi Trump në një intervistë për programin “60 Minutes” të kanalit “CBS”.
Zyrtarët amerikanë janë prej kohësh të shqetësuar se “Kina mund të përdorë forcën ushtarake” për të marrë nën kontroll Tajvanin, një ishull demokratik vetëqeverisës që Pekini e konsideron pjesë të territorit të tij.
Ligji amerikan i “Marrëdhënieve me Tajvanin“ nuk e detyron SHBA-në të ndërhyjë ushtarakisht në rast të një sulmi kinez, por përcakton se politika amerikane është të ndihmojë Tajvanin të mbrohet dhe të parandalojë çdo ndryshim të status quo-së nga Pekini.
Leave a Reply