Greqia synon të bëhet një portë hyrëse për furnizimet me gaz natyror të lëngshëm (LNG) nga Shtetet e Bashkuara të Amerikës në Evropë, ndërsa BE përpiqet të shkëputet plotësisht nga gazi natyror rus deri në fund të vitit 2027.
Kryeministri grek, Kyriakos Micotaqis paraqiti sot planet në konferencën ndërkombëtare të energjisë në Athinë, të quajtur Partneriteti për Bashkëpunim Transatlantik të Energjisë (P-TEC).
Përfaqësues nga më shumë se 20 vende evropiane po marrin pjesë në takimin dyditor, si dhe sekretari amerikan i Energjisë, Chris Wright dhe sekretari i Brendshëm i SHBA-së, Doug Burgum.
“Ndalimi i gazit natyror rus është një mundësi për të riformësuar strategjinë energjetike të Evropës Juglindore”, tha Mitsotakis. “Furnizimet me gaz natyror nga SHBA-ja do të luajnë një rol kryesor, në këtë rast”, tha ai.
Greqia ka nënshkruar një marrëveshje për të importuar 0,7 miliardë metra kub gaz natyror të lëngshëm në vit – duke filluar nga viti 2030 – marrëveshja e saj e parë afatgjatë e furnizimit me gaz nga Shtetet e Bashkuara të Amerikës, e cila synon të zëvendësojë hyrjet e gazit rus në Evropë.
Marrëveshja 20-vjeçare vjen disa muaj pasi administrata Trump dhe Bashkimi Evropian nënshkroi një marrëveshje tregtare në korrik, ndërsa Evropa është zotuar se do të blejë energji me vlerë 250 miliardë dollarë amerikanë – naftë, LNG dhe teknologji bërthamore – çdo vit për tre vitet e ardhshme, ndërsa kërkon të heqë gradualisht gazin rus nga viti 2027, sipas “Reuters”.
Leave a Reply