Bisedimet midis Pakistanit dhe Afganistanit për zgjidhjen e mosmarrëveshjes së tyre kufitare përfunduan pa ndonjë rezultat, bënë të ditur sot të dyja palët, duke rrezikuar një armëpushim të brishtë.
Bisedimet në Stamboll, të ndërmjetësuara nga Turqia dhe Katari, të cilat ishin ndërprerë më parë, rifilluan të enjten për raundin e tretë.
“Bisedimet kanë përfunduar”, tha ministri pakistanez i Mbrojtjes, Khawja Asif, për transmetuesin “Geo News “ në një interviste dje në mbrëmje. Burime të sigurisë pakistaneze thane sot se pala afgane kishte refuzuar të nënshkruante një marrëveshje të shkruar.
Qeveria talebane e Afganistanit fajësoi dështimin e bisedimeve për “qëndrimin jo të përgjegjshëm dhe jo bashkëpunues” të delegacionit pakistanez, sipas një deklarate të zëdhënësit të qeverisë Zabihullah Mujahid.
Delegacioni pakistanez “nuk tregoi asnjë gatishmëri për të marrë përgjegjësi për sigurinë e Afganistanit apo të vetën”, shkroi ai në X.
Afganistani nuk do të “lejojë që ndonjë vend të përdorë territorin e tij… për të cenuar sovranitetin, pavarësinë ose sigurinë e Afganistanit”, shtoi Mujahid.
Por ministri pakistanez i Informacionit, Ataullah Tarar, tha se “përgjegjësia bie mbi Afganistanin për të përmbushur angazhimet e tij ndërkombëtare, rajonale dhe bilaterale për kontrollin e terrorizmit, në të cilat deri më tani ata kanë dështuar,” në një postim në X.
Leave a Reply