Të huajve, të cilët kërkojnë vizë amerikane për të jetuar në Shtetet e Bashkuara, mund t’u refuzohet kërkesa, në rast se gjendja e tyre shëndetësore nuk është e mirë dhe mund të vlerësohet se ata do të jenë rëndues për buxhetin dhe programet shëndetësore që zbatohen në SHBA. Sipas një direktive të Uashingtonit për zyrat konsullore në mbarë botën, në kushtet jo të favorshme shëndetësore për të siguruar një vizë qëndrimi në SHBA, ndër të tjera, janë diabeti, tumoret, sëmundjet kardiovaskulare dhe shëndeti mendor.
Ambasadat amerikane mësohet se kanë marrë një kabllogram nga Departamenti i Shtetit për të bërë vlerësimin shëndetësor të aplikantëve për vizë qëndrimi, ndonëse kontrolli mjekësor për ta është pjesë e procesit të aplikimit. Në këtë kontroll përfshihen sëmundjet e tuberkulozit dhe historiku i vaksinave. Lista e re e sëmundjeve që do të kontrollohen dhe mund të ndikojnë në marrjen ose jo të vizës amerikane, nuk ndalet vetëm te 4 kategoritë bazike. Në kabllogram përmenden edhe obeziteti, azma, apnea e gjumit dhe presioni i lartë i gjakut, pasi për trajtimin e tyre në SHBA një imigrant mund të krijojë kosto për shërbimin shëndetësor vendas.
“Për të gjitha këto sëmundje kërkohet një trajtim i gjatë dhe i kushtueshëm”, thuhet në kabllogramin për seksionet konsullore të ambasadave amerikane.
Sipas rekomandimit të Departamentit të Shtetit, lista e kontrollit do të zgjerohet për të evituar që aplikantët në të ardhmen të kthehen në ngarkesë për programet publike të trajtimit të sëmundjeve të ndryshme në SHBA. Në rekomandim janë përfshirë të gjithë aplikantët për vizë udhëtimi drejt SHBA, por për ata që aplikojnë për vizë qëndrimi kontrolli do të jetë më rigoroz.
Megjithatë mbetet e paqartë se si do të zbatohet norma shtrënguese e Departamentit të Shtetit, në kuadër të politikave frenuese ndaj imigrantëve, pasi rreth 10 % e popullsisë botërore vlerësohet se vuan nga diabeti. Gjithashtu, sëmundjet kardiovaskulare janë shumë të përhapura.
Leave a Reply