Pas mbylljes së procesit të votimit në orën 18:00 të së dielës dhe dorëzimit të kutive të votimit në KZAZ-të përkatëse, ka filluar edhe procesi i numërimit të votave për 5 bashkitë e vendit: Vlorë, Tepelenë, Cërrik, Berat dhe Mat.
Në të pesë bashkitë është vënë re menjëherë një avantazh i thellë i kandidatëve të Partisë Socialiste, kundrejt kandidatëve të pavarur, të mbështetur nga opozita.
Në të gjitha qendrat e këtyre pesë bashkive kishin të drejtë vote në total 334 mijë qytetarë, ku pjesëmarrja e tyre rezultoi me 18.51%. Pjesëmarrjen më të lartë e shënoi Bashkia Mat me 39.23%, ndërsa më e ulët ishte në Bashkinë Vlorë me 12.59%. Pjesëmarrja në bashkitë e tjera ishte: Tepelenë 34.63%, Cërrik 24.81% dhe Berat 19.81%.
Procesi i votimit në zgjedhjet e pjesshme vendore u zhvillua kryesisht në mënyrë të qetë dhe pa incidente.
Në këto zgjedhje të pjesshme, në Vlorë garuan për të marrë drejtimin e Bashkisë, kandidatja socialiste Brunilda Mersini përballë Dionis Sotës, kandidatit i pavarur i mbështetur nga opozita, si dhe anëtari i këshillit bashkiak nën siglën e demokratëve Gjergj Nika.
Për bashkinë e Beratit, në garë ishin kandidati socialist Ervin Caka dhe kandidati i pavarur, Pavlo Shkarpa, i mbështetur nga opozita.
Për bashkinë e Matit në garë ishin kandidati socialist Altin Bojni dhe kandidati i pavarur Eduard Brahilika, i mbështetur nga opozita.
Në Cërrik, kandidati socialist Florenc Doka përballej me kandidatët, Amarildo Hoxha i mbështetur nga Partia Demokratike dhe aleatët, dhe Eligert Hima i propozuar nga Partia “Lëvizja Shqipëria Bëhet”.
Për bashkinë e Tepelenës garonin kandidati socialist Gramoz Sako, ndërsa opozita ka mbështetur kandidatin e pavarur Gabriel Guma.
Kryebashkiakët që do të dalin fitues nga këto zgjedhje do të kenë mandat deri në zhvillimin e zgjedhjeve të radhës lokale në pranverën e vitit 2027.
Leave a Reply