Korporata e Investimeve merr përsipër realizimin e Korpusit të Sigurisë

Qeveria ka ngarkuar Korporatën e Investimeve me realizimin e procedurave për ndërtimin e Korpusit të Sigurisë, që do të grumbullojë disa nga institucionet kryesore të sigurisë dhe agjencitë ligjzbatuese. Me një vendim në mbledhjen e së mërkurës, është autorizuar shoqëria aksionare “Korporata e Investimeve Shqiptare”, vetë apo nëpërmjet entitetit të krijuar prej saj, për të vepruar si zhvillues i disa pronave në periferi të Tiranës, në funksion të realizimit të projektit të investimit “Korpusi i Sigurisë”, i cili ka si qëllim, ndër të tjera, përmbushjen e interesit publik.

“Autorizohet Korporata e Investimeve Shqiptare dhe institucionet publike përfituese, që, brenda 30 ditëve, të lidhin marrëveshje bashkëpunimi për përcaktimin e standardit, të metodologjisë, të termave dhe të kushteve të bashkëpunimit për përmbushjen e interesit publik, si dhe përmbushjen e interesit të Korporatës e të entiteteve, në pronësi të të cilit/ave regjistrohet prona e re shtetërore”, thuhet në vendim.

Gjithashtu, Korporata e Investimeve Shqiptare është autorizuar nga qeveria për hapjen e procedurës konkurruese për përzgjedhjen e partnerit privat për zhvillimin e disa pronave në periferi të kryeqytetit, nëpërmjet instrumentit të sipërmarrjes, me qëllim realizimin e projekteve të investimit.

Disa nga institucionet që do të përfshihen në Korpusin e Sigurisë janë Drejtoria e Përgjithshme e Policisë së Shtetit, Akademia e Sigurisë, Inspektoriati Kombëtar i Mbrojtjes së Territorit, Agjencia e Mbikëqyrjes Policore, Drejtoria Rajonale e Tiranës e Inspektoratit Kombëtar të Mbrojtjes së Territorit dhe Instituti i Policisë Shkencore.