Korporata britanike e transmetimit, BBC i ka kërkuar ndjesë presidentit amerikan, Donald Trump për mënyrën se si ishte montuar një pjesë e fjalimit të tij në programin “Panorama” në vitin 2024, duke e cilësuar atë si një “gabim në gjykim”.
BBC shtoi se programi “nuk do të transmetohet më në asnjë platformë të BBC-së në këtë formë”.
Sipas korporatës, shefi Samir Shah i ka dërguar një letër personale Shtëpisë së Bardhë për t’i kërkuar falje për montazhin e fjalimit, por shtoi se “ndërsa BBC-ja shpreh keqardhje të sinqertë për mënyrën se si u montua videoja, ne nuk pajtohemi se ka bazë për një pretendim për shpifje”.
Në fillim të javës, Trump tha se kishte një “detyrim” të niste një padi me vlerë miliarda dollarë kundër korporatës, duke deklaruar në një intervistë për “Fox News“ se BBC-ja kishte mashtruar publikun me montazhin e fjalimit, i cili e bënte të dukej sikur ai po u bënte thirrje qytetarëve të sulmonin Capitol-in më 6 janar 2021.
“Ky program u rishikua pas kritikave për mënyrën se si ishte montuar fjalimi i presidentit Donald Trump të 6 janarit 2021”, thuhej në një sqarim të BBC-së.
“Gjatë asaj sekuence, ne shfaqëm fragmente të marra nga pjesë të ndryshme të fjalimit. Megjithatë, pranojmë se montazhi ynë krijoi pa dashje përshtypjen se po tregonim një pjesë të vetme të vazhdueshme të fjalimit, në vend të fragmenteve nga momente të ndryshme, dhe se kjo dha përshtypjen e gabuar se presidenti Trump kishte bërë një thirrje të drejtpërdrejtë për veprim të dhunshëm”, pretendoi BBC.
“BBC-ja dëshiron t’i kërkojë ndjesë presidentit Trump për këtë gabim në gjykim”, tha ajo.
Leave a Reply