Zyrtarë të lartë të Pentagonit kanë mbërritur në Ukrainë për të diskutuar përpjekjet për t’i dhënë fund luftës me Rusinë, tha ushtria amerikane, sipas BBC. Ekipi, i udhëhequr nga sekretari i Ushtrisë Amerikane, Dan Driscoll zhvilloi bisedime me kryeministren ukrainase, Yulia Svyrydenko.
Ata pritet të takohen me presidentin ukrainas Volodimir Zelenski.
Sipas një raporti të fundit, SHBA-ja dhe Rusia kanë përgatitur një marrëveshje kornizë për t’i dhënë fund luftës, duke kërkuar lëshime territoriale nga Ukraina, përfshirë tkurrjen dramatike të ushtrisë së saj.
Thuhet se plani u hartua nga i dërguari special i presidentit Donald Trump, Steve Witkoff, dhe homologu i tij rus, Kirill Dmitriev.
As Uashingtoni dhe as Moska nuk e kanë konfirmuar zyrtarisht planin. Megjithatë, sekretari amerikan i Shtetit, Marco Rubio shkroi në X se arritja e një paqeje të qëndrueshme do të kërkonte që të dyja palët të binin dakord për lëshime të vështira, por të domosdoshme.
Ai tha se SHBA-ja po konsultohej me të dyja palët e konfliktit për të hartuar një listë idesh të mundshme për t’i dhënë fund luftës.
Ekipi i Driscoll është grupi më i lartë ushtarak që udhëton në Kiev që kur Trump mori detyrën në janar.
Ai shoqërohet nga shefi i shtabit të ushtrisë, gjenerali Randy George, komandanti i lartë i ushtrisë amerikane në Evropë, gjenerali Chris Donahue, dhe rreshteri major i ushtrisë, Michael Weimer.
Leave a Reply