Rikthimi i Rusisë në formatin G8 nuk duhet të ndodhë, tha përfaqësuesja e lartë e BE-së për Punët e Jashtme dhe Politikën e Sigurisë, Kaja Kallas në një program të “BBC Radio 4”. Sipas Kallas, plani përfundimtar i paqes për t’i dhënë fund luftës në Ukrainë duhet ta bëjë të pamundur një pushtim të ri rus.
“Nëse duam që kjo t’i japë fund kësaj përgjithmonë, ne duhet të kemi lëshime nga ana e Rusisë”, theksoi ajo. “Një qasje e tillë do të kërkonte që Moska të mbështeste marrëveshjet ndërkombëtare dhe të reduktonte Forcat e saj të armatosura”, tha Kallas.
Kallas gjithashtu hodhi poshtë mundësinë e rkthimit të Rusisë në formatin G8, siç parashikohet në planin e paqes të Trump për Ukrainën. Ajo shtoi se kjo kategorikisht nuk duhej të ndodhte.
Ndërsa mirëpriti “kauzën fisnike” të presidentit të SHBA-së Donald Trump për të arritur paqen në Ukrainë, Kallas tha gjithashtu se ishte e nevojshme të vihej në pikëpyetje se cilët elementë sillnin vërtet paqe në vend.
Ukraina dhe Shtetet e Bashkuara të Amerikës, pas negociatave midis delegacioneve të të dy vendeve në Gjenevë, ranë dakord të vazhdojnë punën mbi propozimet e përbashkëta për një marrëveshje paqeje.
Palët konfirmuan se çdo marrëveshje e ardhshme duhej të respektonte plotësisht sovranitetin e Ukrainës dhe të siguronte një paqe të qëndrueshme dhe të drejtë.
Leave a Reply