Izraeli nis operacion të gjerë ushtarak në Bregun Perëndimor të pushtuar

Ushtria izraelite nisi të mërkurën një operacion të gjerë ushtarak në Bregun Perëndimor të pushtuar, sipas burimeve lokale. Ushtria ka forcuar ndjeshëm praninë e forcave në qarkun verior të Tubasit dhe ka dislokuar buldozerë ushtarakë në disa zona, ndërsa helikopterë izraelitë kanë hapur zjarr drejt objektivave ende të paidentifikuara, raportoi një korrespondent i Anadolus.

“Kjo është hera e parë pas shumë vitesh që helikopterët Apache përfshihen në një operacion të tillë, duke qëlluar me mitralozë të rëndë drejt zonave të banuara”, tha në një deklaratë në Facebook, guvernatori i Tubasit, Ahmad Al-Asaad.

Operacioni izraelit kishte në shënjestër qytetin e Tubasit, si dhe fshatrat Aqaba dhe Tammun. Ushtria vendosi shtetrrethim dhe bllokoi të gjitha hyrjet e qarkut me barriera dhe postblloqe ushtarake. Lëvizja e ambulancave dhe e ekipeve mjekësore u kufizua, tha guvernatori.

Forcat izraelite kryen bastisje në disa banesa në fshatrat Tammun, Tubas, al-Far’a dhe Tayasi, duke i shndërruar shumë prej tyre në pika ushtarake, shtoi Asaad.

Ai tha se është ngritur një komitet emergjence për të reaguar ndaj situatës në terren dhe për t’u marrë me rastet humanitare dhe nevojat thelbësore, duke konfirmuar se qarku po punon në koordinim me institucionet lokale për të ofruar shërbimet e nevojshme emergjente.

Shkollat dhe vendet e punës kanë pezulluar aktivitetin si pjesë e masave të sigurisë.

Ushtria izraelite tha në një deklaratë të mërkurën se forcat e saj nisën një operacion gjatë natës në veri të Bregut Perëndimor, së bashku me Shin Bet dhe policinë, duke pretenduar se kjo bëhej si pjesë e “përpjekjeve kundër terrorizmit” në zonë.

Asaad i tha Anadolu-s se pala izraelite ka njoftuar autoritetet palestineze se operacioni ushtarak në qark do të vazhdojë për disa ditë, të cilin ai e quajti një “përshkallëzim të rrezikshëm”.

Guvernatori mohoi pretendimet izraelite për praninë e “personave të kërkuar” brenda Tubasit, duke theksuar se “operacioni është politik, jo i lidhur me sigurinë”.

Ushtria izraelite e ka përshkallëzuar dhunën në Bregun Perëndimor që nga fillimi i luftës në Rripin e Gazës në tetor 2023.