Presidenti amerikan, Donald Trump, tha se do të takohej me presidentin rus, Vladimir Putin dhe presidentin ukrainas, Volodimir Zelenski për marrëveshjen e paqes të propozuar nga SHBA-ja – vetëm kur ajo të arrinte në fazat e saj përfundimtare, sipas “Independent”.
Në një postim në “Truth Social”, presidenti amerikan, Trump tha se kishte dërguar në Moskë dhe Kiev të dërguarin e posaçëm, Steve Witkoff në një përpjekje për të zgjidhur “disa pika të mbetura mosmarrëveshjeje” midis vendeve ndërluftuese.
Më herët Trump tha se negociatorët ishin “shumë afër” një marrëveshjeje, ndërsa disa raporte sugjeruan se Ukraina ishte gati të “vazhdonte përpara” me marrëveshjen kornizë të paqes të propozuar nga SHBA-ja.
Por, një zyrtar ukrainas tha se çështjet më të ndjeshme të marrëveshjes do të duhej të diskutoheshin nga Trump dhe presidenti ukrainas, Volodimir Zelenski, pas pretendimeve se Kievi kishte pranuar kushtet e një marrëveshjeje.
Kievi tha se mbështeste “thelbin” e marrëveshjes së paqes pas negociatave intensive midis zyrtarëve amerikanë dhe ukrainas në Gjenevë.
Leave a Reply