Ukraina ka vendosur sanksione ndaj më shumë se 50 anijeve që Rusia përdor për të eksportuar grurë nga territoret e pushtuara, njoftoi në fjalimin e tij të mbrëmshëm presidenti Volodimir Zelenski. “Ky është një drejtim i ri i sanksioneve tona dhe disa prej këtyre anijeve tashmë janë sanksionuar nga partnerët tanë, por jo të gjitha, dhe ne do të vazhdojmë ta rrisim këtë presion”, tha ai në Kiev.
Zyra e presidentit Zelensky publikoi listën me 56 anijet e grurit, së bashku me pronarët e tyre.
Anijeve u është ndaluar hyrja në portet ukrainase dhe çdo biznes që përdor këto anije është i ndaluar.
Shumica e anijeve lundrojnë nën flamurin rus, ndërsa disa të tjera nën flamurin e Panamasë ose vendeve të tjera.
Në zonat e Ukrainës jugore të pushtuara nga trupat ruse, kultivimi i grurit vazhdon, dhe Rusia e eksporton atë në vende të tjera.
Për këtë qëllim përdoren portet në Krime dhe në brigjet jugore të Rusisë. Ukraina pretendon se ky është grurë i vjedhur.
Leave a Reply