Presidenti turk, Rexhep Taip Erdogan e ka quajtur vizitën e Papës Leoni XIV në Türkiye një “hap shumë të rëndësishëm që forcon themelet tona të përbashkëta”. Papa Leoni XIV, kreu i shtetit të Vatikanit dhe udhëheqësi shpirtëror i botës katolike, mbërriti në kryeqytetin turk Ankara të enjten në udhëtimin e tij të parë jashtë vendit, që përfshin si Turqinë, ashtu edhe Libanin.
Papa do të qëndrojë në Turqi deri të dielën në një vizitë zyrtare me ftesë të presidentit turk. Përveç Ankarasë, ai është planifikuar të vizitojë Stambollin dhe Iznikun, një vend historik për Kishën e hershme të krishterë, kur njihej si Nikea.
Në një fjalim të përbashkët në Kompleksin Presidencial në Ankara, Erdogan tha se vizita e Papës vjen në një moment shumë kritik mes tensioneve rajonale dhe globale. “Besoj se mesazhet që do të jepen nga Türkiye (së bashku me Papën Leoni XIV) do t’i arrijnë botës turko-islame dhe botës së krishterë, si dhe do t’i forcojnë shpresat për paqe në gjithë globin”, tha Erdogan.
Mes debateve më të gjera për diskriminimin dhe bashkëjetesën paqësore, Erdoğan tha: “Intoleranca ushqen konfliktin dhe konflikti ushqen përçarjen dhe urrejtjen. Islamofobia dhe ksenofobia në rritje në Perëndim janë shfaqje të këtij cikli të rrezikshëm”. Ai tha se në mes të konflikteve, krizave dhe padrejtësive përreth, Türkiye mban përgjegjësi, duke zgjedhur rrugën e vështirë ndaj të lehtës për të mbrojtur paqen dhe drejtësinë.
Presidenti turk tha gjithashtu se thirrjet e Papës për paqe dhe dialog kanë rëndësi të madhe për suksesin e procesit diplomatik në luftën Rusi-Ukrainë.
Turqia po ndjek nga afër përpjekjet e fundit për t’i dhënë fund konfliktit dhe po punon për të ofruar mbështetjen dhe ndihmën e nevojshme, shtoi ai.
Leave a Reply