Zyrtarët amerikanë dhe ukrainas kanë arritur marrëveshje për 18 nga 20 kushtet në marrëveshjen e propozuar të paqes, pas bisedimeve të fundit në Gjenevë, ndërsa dy pikat e pazgjidhura mbeten për shkak se janë “çështje delikate”, sipas një raporti të Axios të enjten.
Mendohet se këto çështje të pazgjidhura lidhen me mosmarrëveshjet territoriale dhe natyrën e garancive të sigurisë nga ShBA-ja, çështje të ndjeshme për të cilat zyrtarët ukrainas më herët i thanë Financial Times se do të vendosen nga presidenti amerikan, Donald Trump, dhe presidenti ukrainas, Volodimir Zelenski.
Trump nisi nismën e re të paqes pas një takimi në Shtëpinë e Bardhë më 18 nëntor, ku plani prej 28 pikash u mbështet nga nënpresidenti JD Vance dhe sekretari i Shtetit Marco Rubio si një potencial “përparim i madh”, sipas raportit. Takimi hodhi themelet për bisedimet e fundit në Gjenevë, ku delegacionet e reduktuan planin fillestar prej 28 pikash në 20 pika.
Ndërkohë, një zyrtar tha se, pavarësisht spekulimeve në internet për një “përçarje” mes Vance dhe Rubios, dy zyrtarët po punojnë së bashku si një “skuadër e unifikuar” për planin e paqes.
Propozimi fillestar i SHBA-së kërkonte që Ukraina të bënte koncesione të rëndësishme, duke përfshirë njohjen e kontrollit rus mbi territoret e saj, kufizimin e personelit ushtarak dhe pranimin për të mos u anëtarësuar në NATO.
Leave a Reply