Presidenti amerikan, Donald Trump, shprehu optimizëm në lidhje me negociatat aktuale për t’i dhënë fund luftës mes Rusisë dhe Ukrainës, duke thënë se beson se ekziston “një shans i mirë që ne të arrijmë një marrëveshje”.
Ai foli pasi zyrtarë të lartë amerikanë dhe ukrainas e vlerësuan takimin e së dielës në Florida si “produktiv”. Trump konfirmoi se ka biseduar me negociatorët kryesorë, sekretarin e shtetit Marko Rubio dhe të dërguarin e posaçëm Steve Witkoff, duke theksuar se “po bëjnë hapa përpara”.
“Mendoj se Rusia do të dëshironte që kjo të përfundonte dhe e di që Ukraina do të dëshironte që kjo të përfundonte”, u tha ai gazetarëve në bord të Air Force One, teksa kthehej në Uashington nga rezidenca e tij Mar-a-Lago në Florida, ku kaloi Ditën e Falënderimeve.
Edhe pse pritet që Witkoff të takohet me zyrtarë rusë këtë javë për të vazhduar bisedimet, Trump tha se nuk i ka vendosur Moskës ndonjë afat konkret, duke shtuar se i vetmi afat i tij është që lufta të marrë fund.
Bisedimet në Florida, të cilat pasuan takimin në Gjenevë, u fokusuan në sigurimin e një të ardhmeje më të fortë dhe më të begatë për Ukrainën, edhe pse Rubio pranoi se procesi mbetet delikat dhe kërkon pjesëmarrjen e Rusisë si pjesë e ekuacionit.
Sekretari i Këshillit të Sigurisë Kombëtare dhe Mbrojtjes së Ukrainës, Rustem Umerov, i cili i udhëhoqi bisedimet në emër të vendit të tij, tha se palët kanë arritur “përparim të prekshëm në rrugën drejt një paqeje të drejtë” pas “një raundi të vështirë, por produktiv negociatash”.
Leave a Reply