Presidenti rus, Vladimir Putin, nuk dëshiron të arrijë një marrëveshje për luftën në Ukrainë, tha sot kryeministri britanik Keir Starmer, pasi pesë orë bisedime me të dërguarit amerikanë në Kremlin përfunduan pa asnjë përparim.
Starmer tha se Britania e Madhe do të vazhdojë punën ”për të ushtruar presion në çdo mënyrë të mundshme”, përfshirë faktin që ”t’i shkaktojë sa më shumë dëme të jetë e mundur ekonomisë ruse” përmes sanksioneve.
Më herët, lideri rus kishte akuzuar aleatët evropianë të Kievit se po sabotonin përpjekjet e udhëhequra nga SHBA-ja për t’i dhënë fund luftës dhe kishte hedhur poshtë si të papranueshme ndryshimet e propozuara nga Ukraina dhe Evropa në një draftplani paqeje.
Gjatë pyetjeve sot në parlament deputeti konservator Bernard Jenkin pyeti se ”a mund të japë kryeministri vlerësimin e tij për lajmet e fundit se presidenti Putin ka refuzuar sërish kushtet për paqe në Ukrainë?”
”Të gjithë e dimë që Putin është agresori këtu”, u përgjigj Starmer.
”Të gjithë e dimë që Putin po e zvarrit situatën, nuk dëshiron të ulet në tryezë, nuk dëshiron të arrijë një marrëveshje”, tha ai në Dhomën e Komuneve.
”Ne duhet të vazhdojmë të ushtrojmë presion në çdo mënyrë të mundshme”, shtoi ai.
Leave a Reply