Moldavia në shënjestër, trajnime sekrete në Serbi nga agjentë rusë

Në Moldavi, autoritetet parandaluan trazira masive të organizuara nga një grup i stërvitur në Serbi nga agjentë rusë, duke arrestuar dhjetëra persona dhe sekuestruar prova për aktivitete të paligjshme. Dyshohet se agjentët rusë, nga e ashtuquajtura Qendër Humanitare Serbo-Ruse, në Nish, ndihmuan grupin terrorist të Milan Radojçicit, i cili më 24 shtator sulmoi Policinë e Kosovës.

Serbia po përballet me akuza se agjentë rusë kanë trajnuar qytetarë nga Moldavia në territorin serb, me qëllim që ata të nxisnin trazira masive. Autoritetet moldave arritën të parandalonin këtë sulm, duke kryer rreth 50 bastisje dhe duke gjetur prova se grupi kishte planifikuar aktivitete të paligjshme në shkallë të gjerë, në këmbim të përfitimit financiar.

Autoritetet moldave bëjnë të ditur se grupi ishte stërvitur më parë në një kamp në Serbinë perëndimore, me qëllim të shkaktonin tensione, protesta dhe të ndikojnë në rendin publik dhe sigurinë e qytetarëve moldavë. Ky nuk është tentimi i vetëm i këtij grupi të stërvitur nga agjentët rusë.

Në shtator të vitit 2025 u mbajtën zgjedhjet parlamentare në Moldavi, të cilat u panë si vendim kyç për orientimin e këtij shteti të Evropës Lindore mes Brukselit dhe Moskës. Një javë para zgjedhjeve, autoritetet moldave arrestuan dhjetëra persona nën dyshimin për përgatitjen e trazirave masive. Shumica e tyre rezultoi se ishin trajnuar në Serbi.

Digital Forensic Center, një institucion i njohur në Podgoricë që merret me analizimin e ndikimit rus dhe aktiviteteve të GRU-së në Ballkan, thotë se edhe në rastin e Moldavisë në vitin 2025, edhe në atë të Malit të Zi më 2016, është evidentuar aktivitet i agjentëve të shërbimit të inteligjencës ushtarake ruse (GRU), me qëllim destabilizimin e shtetit përmes nxitjes së trazirave, financimit të strukturave kriminale dhe organizimit të protestave të dhunshme.

Rusia jo rrallë ka synuar që, përmes eksponentëve të saj, të krijojë trazira edhe në Kosovë. Sipas informacioneve nga institucionet e sigurisë së Republikës së Kosovës, dyshohet se grupi i armatosur serb, nën drejtimin e Milan Radojçiqit, i cili sulmoi më 24 shtator Policinë e Kosovës duke vrarë një polic dhe duke plagosur disa të tjerë, ishte trajnuar në të ashtuquajturën Qendra Humanitare Serbo-Ruse në Nish.